رجعت الشتويه -NEGATIVE

رجعت الشتويه, صقعه وشتا ومجبور تلبس شي 3- 4 بلايز, فرصه البس بشي طبقه مخفيه وحده من البلوزات اللي اشترتهن امي... هي بتكون راضيه انها نجحت هاي المره باختيار بلوزه تعجبني , وانا بكون دافي من رضاها. والامل انه الاقي شي 50 شيكل بالجاكيت ناسيها من الشتويه اللي مضيت بيتفجر, الجيبه نضيفه وحتى انه بدها تقطيب...ء

رجعت الشتويه, وبصير احس اني ولد زغير, قبل ما اطلع من البيت بسمع نفس الملاحظات من شتا 82 ... إلبس جاكيت , إلبس لفحه, وين طالع بهالصقعه والشتا...وجهك سخن... اسى تحممت ... تطولش

رجعت الشتويه, المكيف بالسياره بشتغلش, بتصير تعرف الله عن قرب وانتي تدعي يارب ما تطفي السياره او يا رب تدور ,يارب يفتح باب السياره يا رب اي باب بدك بس افتح وخليني افوت وهناك ادعيه اخرى تضرب في باب الشبابيك الكهروبائيه واليدويه (شو الفرق طالما التنين بيتشغلو عن طريق مفك ومفضل يكون لونه بردقاني نظرا لشعبيه هذه المفكات على الشبابيك, ولمن يريد ان يعرف طريقه الاستعمال ,ليراسلني) وهي عاده :يارب يسكر الشباك ومن المحبذ ان تقارع في رب الشباك وانت موقف السياره على جنب حتى لا تضطر الى استعمال اسنانك في شد الشباك لفوق بدل من يدك اليسرى المشغوله في المقود وفي تمسيح الشباك من البخار المتراكم على الزجاج الامامي وفي البعبصه في الراديو لتختار اغنيه تليق بهذه البعصه (هذه كانت نصيحه اليوم لوجه الله تعالى ، تعال) . ومع سقوط اول نقطه مي الست اللي قدامك بتخلع... بس للأسف بتخلع بريك ,خايفه تزحلق .كعاده الحوائيات في خلق الازمات , بتقفل وبتبلش ازمه السير تبعت 4 على الساعه 1:30 ساعتها بتدعي يا رب تمشي وتلحق هذه الدعو بزمور للتذكير فإن الذكرى تنفع اللي مسكره الشباك وعامله حالها مش سامعه وبتطلع عليك بالمرايه بنظره" شو؟ اطير يعني!" طبعا كنت بفضل انها تطلع علي بالمرايه بنظره تانيه بشي وحده من نظرات الياي وخواتها! بس من جهتي اه طيري وما تهدي

واذا كانت شي فرفوره بالسياره اللي حدك بتدعى الله يا رب ما تمشي وبتضل تطلع عليها لحتى يلتقو نظراتكو وازا حدث والتقو طبعا بتفتح الشباك اللي حدك وبتقولها... شو هاد وبعدين حركه السير ...شكلها مقفله واكيد هي رح تجاوبك..." اه مقفله" وانتي بتدير وجهك لقدام انه مش معبرها يعني ومستعجل... وابن الشرموطه اللي وراك بيزمر يلا...(على شو مستعجل! مهو شايف السير, تطير يعني ) وانتي بتعاود تطلع عليها وبتقولها.. الطقس حلو ...على اساس انها من اجمد الجمل علشان تبلش مع صبيه بعد اكتشافي انه "قديش الساعه؟" ما عادت تنفع

وهي بدورها بترد عليك بحركه كفه ايدها انه بدها تزرق قدامك لانه السياره اللي قدامك زمان مشيت وانتي غاطس..وطبعا بتمرقها وازا كنك زلمه سكر الشباك بتبلش تدعي ادعيه ذكرنها سابقا... يارب تمشي ويارب يسكر الشباك, اللهم آميـن

رجعت الشتويه, الحيطان مرطبه ,السقف بيدلف مي ,والكهربا يا انها قاطعه او انها رح تقطع( خصوصي علشان احنا عرب) ولما تقطع الكهربا بتستسلم لوسيله الترفيه الوحيده "اينسامبل المزراب" وبخاصه ازا كان طاير شي كيس نقارش او تنكه كولا فاضيه وطبت تحت مصب المي من المزراب اللي عاده ما بينشزها شي ضربه رعد وبرق قويه ,بالاحرى صرخه اختي الصغيره وهي مرتعبه من الصوت وعاده ما يرن التلفون من احد الاقارب او الجيران يسأل " ألو... في عندكو كهربا " واجيبه بثقه اه ... فيه ! ليش قطعت عندكو؟ طيب تعال خود شوي... مشي حالك الليله...

ضربه الرعد تهز البيت اختي تقرر انها ستنام في غرفه امي

رجعت الشتويه, وخملت الناس مش الكل عنده قوه قلب يطلع من البيت بس مرات بتكون لصالحي, يعني لما ما بدي اروح على محل بيكون عندي حجه سخنه! انه الدنيا برد وشتا ما غدرت اطلع من البيت او انه مرشح وتعبان... بس ازا لا بد اطلع على شي محل فهو على "البيت الفلسطيني" مطعم ومقهى في الناصره بالاحرى بحب الطريق لهناك زقاقات السوق القديم ,الهوا البارد بيتحايل عليك كرقصه فلامنجو بتضرب وبتتنقل من زاويه لزاويه وبكون صبابا اكثر اذا رطبت الجو قطرات المطر..بعرفش ليش بس انا بحب تشتي علي الدنيا في3 محلات بالسوق القديم بالناصره وبملاعب الفوتبول وخصوصا اذا فريقي كان غالب وبلندن

رجعت الشتويه...

ملاحظه: توقفت عن كتابه هذا البوست مرتين الاولى اثناء العاصفه الرعديه خوفا ان يتضرر الكومبيوتر والثانيه اجا على بالي اوكل بوظه...