6/6/61 ن.
بناء على طلب الجمهور اترجم لهن ولكم ما كتبه سيد قشوع هذا الاسبوع , الترجمة هي بالتصرف وحسب المزاج, يعني أنْيَك من جوجل ترانسليتور... اليكم.
" الشرطة الاسرائيلية تشغل وحدة مستعربين سرية جديدة بين مواطينها" في البنط العريض على الصفحة الاولى , متت من اضحك على هالخبر , معقول ان هذا الخبر جديد على اليهود, بس بالنسبة للعرب هاذ اشي قديم!
فكل عربي يعرف ان في حارته مستعربين, كل ولد عربي بيغدر يطلع المستعرب بلمحة عين. ببالغ الاسى فمستعربي البوليس هم الوحيدون اللي منظرهن عربي في القرى العربية. وضع هذة الوحدة قاسي لدرجة ان كلمة مستعرب اصبحت سلانج محلي لكلمة out . " شو هالكندرة هاي؟" يخاطب الشاب العربي ساخراً صديقه الذي اشترى كندرة من تشكيلة صيف 2008, " شو, كنك مستعرب؟"
المستعربين, على النقيد من العرب, لا يكتفون بكولكشن صيف 2008 , فلبيس الوحدة, متقوقع في سنوات ال 80 فعلى قولة المثل, "قل لي ماذا تلبس , أقل لك من اي وحدة انت" .
المستعربين, هم المشوه الوحيد لجمالية القرى العربية داخل الخط الاخضر, للأسف, فإن هذا سيبلبل, افواج السياح في القرى والمدن العربية ويظنوا ان المستعربين هم جزء من المواطنين. وبالطبع مش حلوة ولا لايقة انك تشوف اربع زلام بقمصان خضر مزررات للنص وشعر صدرهن يتدلى على القميص المورد, قاعدين في بيجو موديل ال64 واقفة على على رصيف مدخل متحف الفن الحديث في الطيرة, او عند مدخل اوبرا رفيق الحاج يحي في الطيبة.
ولكوني كباقي العرب على هذة البقاع, معني ومهتم بفرض سيادة القانون, فانا مستعد للتعاون مع قرار الشرطة بتشغيل المستعربين على الرغم من انه في رأي ان هذا قرار خاطئ. وعلى أمل ان ضباط الشرطة والمسؤولين عن المستعربون يقرأون كل صباح جريدة " هأرتس " - الجريدة التي ينشر بها قشوع مقالاته, ملاحظة لسيد, ضباط الشرطة والمخابرات بيقرأو الباب الاخر مش هأرتس... وهيك رح توصلهن رسالتك وملاحظة لضباط البوليس والمخابرات اكبسوا هون بتوديك على مقالة سيد قشوع بالعبري اسهلكم تقروها احسن لا تقولو اني جايب اشي من عندي... منكمل - فسأستغل هذا المنبر واعطي بعض النصائح للمتجند الجديد. وهي فقط لمساعدة وحدة المستعربون كي لا يظهروا بشكل بارز .
لا تقل انك عامل بناء. لا احد غير المستعربون يعمل في البناء. لاقيلك قصة جامدة اكثر وصادقة.فبلا معلومانية اغلب الشبيبة اللي بجيلك اليوم بتلاقهين بالهايتك. واذا بدك تبين مميز وخاص وخرفيتك تتصدق, بتغدر تعرف على حالك لأبن العرب - لحظة قبل ما تعتقلة بلحظات - على اساس انك مصمم ديكور , مهندس عمار او طيارجي. تسمعش موسيقى عبرية شرقية ولا عربي, الا ازا كانت بجد موسيقى راقية وطلائعية. وعلشان تكون عارف , سمعتكم بالبلد صارت زبالة من تحت راس الموسيقى الخرائية اللي ما حدا غيركو بالبلد بيسمعها. وبحب اضيف لمعلوماتك انه الالبوم الاخير تبع راديو هيد فاقع سيط اخو شرموطة بقلنسوة. والشباب اللي بجيلك وعيوا وكبروا على بوب ديلين, البيتلز, الدورز وخصوصا الرولينج ستونز, الدورز يا جحش مش الدروز. وانتي بعدك الوحيد اللي بيسمع ام كلثوم بتردح بالترانزيت تبعتك.
مندخل لباب القهوة .تشربش قهوة مع هيل, العرب بطلوها من زمان. علشان تصير زي اهل البلد خليك على الماكياتو, والصبح اشرب إسبرسو قصير. ولا بحياتك تطلب بدون كفائين انتو الوحيدين اللي بالناصرة اللي بيشربوش ديكاف.
اما باب الأكل. توكلش حمص, فلافل, شاورما او كباب. هادالاكل صفي بس للسياح و الاسرائيليين. ابعد عن اللبنة. عملوها بس علشان تلائم نياع الاسرئيلي. كل عربي بيعرف انه بزيت الزيتون في سعرات حرارية قد اللة, فلما تطلب صحن السلطة الصحية تبعك حط بس نص معلقة زيت.
باب الثقافة. اعمل اشتراك بالسينماتيك, هو عادة بيكون بشارع الشايش اللي بنص البلد, ولا بأي شكل تسمي السينماتيك " القصبة" . زور مكتبة الحارة مرة في الاسبوع. ومرة بالشهر شوف مسرح. واذا بدك تندمج زي ما لازم لازم تروح تسمع محاضرة مرة بالشهرين. انا شخصية بفضل محضارات التحليل النفسي.
من باب الكلام تحكيش عربي بلهجة عربية. تقولش " واللة" على الطالع والنازل. تسبش بالعربي, العرب دابكين ينشروا عرض بعض ويسبوا بالإيدش وبدي انبهك لشغلة انه بس انتو بيخربط بين الحاء والخاء.
اوعك تستعمل كلمة " حمولة " على المحل بتنكشف انك يهودي. تستعملش مصطلح القتل على شرف العيلة قول خلفية غرامية.
تجربش تِسبح احنا منعرفش. وعلى بين ما يغيرولكوا السيارات لسيارات جديدة مع مجسات ريفرز جرب انه ما ترجعش ريفرسات لأنه لا بد انه في ولد بيلعب ورا السيارة. وعلى فكرة انتوا الوحيدين اللي بيعلقو ديسكات على المراي. قيم المسبحة
تحكيش عن برامج تلفزيون. اغلب العرب فش عندهن تلفزيزن .والاقلية اللي عندها فبتهتم بالمحطات الوثائقية. مرات بيشوفوا " المكتب" و " هاوس" .
تزمرش. توقفش السوبارو تبعتك بمحل ممنوع. تسابقش وانتي بالدور في البريد, في كوبات حوليم -صندوق المرضى- او في البنك. تذكر, جلجولية هاي مش كفار سابا. عارف انه رح يكون صعب عليك بس جرب انك تكون مؤدب.
لحد هون النصايح كانت كيف تتأقلم شكلياً وخارجياً واللي من السهل انك تنفذهن علشان تندمج بالناس. وإسى عزيزي المستعرب شوية نصايح معقدة شوي اللي رح تكون صعبة عليك, مبدئياً بسبب التربية اللي تلقيتها, جو البيت اللي اخذت أطباعه, عارف انه رح يكون صعب عليك بس جرب انك ما تكون عنصري. وحاول قد ما بتغدر انك ما تكون وطني. تكرهش العرب , اغلب العرب بيكرهوش حالهن. تكرهش اليهود, العرب مش لاساميين. طبعاً اذا حميت الاجواء وصار اشي ,بتغدر انك تدين الصهيونيه, او سياسة الحكومة. اما اذا كانت مهمتك مع رجال دين معتدلين فرح تنسمع صا دق امين أذا قلدت معلمك تبع التاريخ. المتدينين المعتدلين عنا هن زي العلمانيين عندكو. واذا علقتوا مع متطرفين ملتحين, رح يستوعبوك بحرارة اذا إقتبست عضو كنيست يهودي يميني وطبعا بدل ما تهاجم المسلمين هاجم اليهود. إفهم شغلة انه معظم الايديلوجية تبعتنا تعلمناها منك, ولا بأي شكل تتنازل عن اورشاليم , بس انتي سميها القدس طبعا, معقول انك تشوفنا فقرا, اغبيا, مجرمين وبدائيين, بس تذكر: انه على عكسك احنا ما منكره الغربا, وانه احنا مش شعب اللة المختار
** مستعربين , مستعربون هاي كلمتين بتغدر تعمل نسخ لصق وين لازم يكون بون بدل بين وبالعكس
المشاركات
