الحاله تعبانه..

بعد خربشت شي 20 تدوينه وعملت ديليت لكمان شي 20
قررت اجيبلكوا قليلا مما خربشت واللي بدو يسهب فيها يسهب على كيفو...

* 12 يوم قتال ومعدل الصواريخ اللي بتضربها حماس على المستوطنات الاسرائيليه ما تغيير...قصف جوي.. توغل بري.. ما تغيير.. توحش بري برضوا ما تغيير

* حكومة اسرائيل بعد بدها جلعاد شاليط؟ وينا اخر مره ذكر في بياناتهم؟

* الناطق بلسان الجيش الاسرائيلي (ما فشر يكون على وزن الناطق بلسان الباب الاخر... هداك طيب وفش متله) بيعرض صور من الجو للاهداف اللي تم قصفها.. في حدا منكو شاف قطعه سلاح من مصانع الاسلحه هاي.. او مخازن الاسلحه؟ ازا حدا منكو شاف يحكي.. لانه برضه الجيش الاسرائيلي مستغرب وما شاف اشي؟

*التعتيم الاعلامي اللي بتقوم في اسرائيل هو تضامن مع اهل غزه اللي عايشيين بالعتمه؟

*في عصر الانفتاح الاعلامي... اسرئيل تعتقل مراسل التلفزيون الايراني وتعتقل صحفيين من قريه كفركنا في الجليل وتعتدي بالضرب على مصور اسرائيلي في تل ابيب وتقتل مصور للتلفزيون الجزائري...( على الاقل هذا ما وردني)

*المحكمه الاسرائيليه تقرر دخول8 صحافيين اجانب بالقرعه واثنان يختارهما الجيش الاسرائيلي.. الجيش اختار اثنان فوكس نيوز وسي بي أس... رؤوس الحربه اليمينيه في الاعلام الامريكي والغى القرعه عقاباً لوكالات الانباء الاجنبيه لأنها غير موضوعيه!
يعني بعد ناقص انه الجيش الاسرائيلي يقصف البي .بي. سي؟

* رددو في هتافاتكم باسماء مرتيزا سيياليرو , مونا ليريني كوندي , باربرا تييدي , جوزييه اليسا فاخاردو ...الفائزات بلقب ميس يونفرس من فينزويلا ...ازا حدا عنده صور يحطهن على الاكونت بالفيسبووك.. وعلى فكره فيزويلا اكتر دوله حصلت على لقب ملكه جمال العالم 5 مرات.. ( هذا كان للي بدو يسهب عن فينزويلا)

*حبيت اطمنكو بس انه" المقاطعه" في رام الله بخير وسلام وصامده اكثر من قبل بفضل اسرائيل وامريكا..

*طلب خاص من اداره التجمع الوطني الديموقراطي بلاش هتافات ضد الدول العربيه اللي بيزورها عزمي بشاره...

*طلب خاص من للحزب الشيوعي الاسرائيلي.. بلاش تعملو من جراح غزة كامبيين انتخابات
* طلب خاص من الحركه الاسلاميه بلاش ترفعوا شعارات " ع رصات م نايك " على الاقل في المظاهرات القطريه... ولكو هاي مظاهره ضد القتل في غزه اذا نسيتوا
* لكل اللي بيدعو انو اسرائيل ما بتخصص ميزانيات للفلسطينيين داخل الخط الاخضر... بحياة ربكو شوفو قديش صرفت الدوله عليكو هالاسبوعين بس! البوليس في كل خزق (وطبعا مش ببلاش) الطيارات بترصد (طبعا مش ببلاش) الكلاب الخون في كل محل ( طبعا مش ببلاش) حملات الاعتقالات طبعا مخصصه فقط للعرب ..(اه فقط للعرب يوأف بار محسوب علينا)... يعنا بحياه اسرائيل كلها ما خصصت ميزانيات بهاي الضخامه للوسط العربي.. بش مش رح تخصينا!

*لشركات الاعلان اللي معنيه بنشر اعلاناتها في المظاهرات.. او المعنيه انه نتظاهر تحت لوحات اعلاناتها الرجاء الحجز مسبقاً.

اه يا غزه...