٣٠.١١.٠٧

نحن اللاحقون ونحن السابقون

لاحق لاحق سابق, لاحق لاحق لاحق, سابق سابق لاحق, سابق سابق سابق, سابق لاحق سابق, سابق ولاحق لاحقين سابق, كل سابق هو لاحق وكل لاحق هو سابق!الرجاء مراعاه الفوارق الزمنيه في المرتفعات والمنخفضات.

٢١.١١.٠٧

رجعت الشتويه -NEGATIVE

رجعت الشتويه, صقعه وشتا ومجبور تلبس شي 3- 4 بلايز, فرصه البس بشي طبقه مخفيه وحده من البلوزات اللي اشترتهن امي... هي بتكون راضيه انها نجحت هاي المره باختيار بلوزه تعجبني , وانا بكون دافي من رضاها. والامل انه الاقي شي 50 شيكل بالجاكيت ناسيها من الشتويه اللي مضيت بيتفجر, الجيبه نضيفه وحتى انه بدها تقطيب...ء


رجعت الشتويه, وبصير احس اني ولد زغير, قبل ما اطلع من البيت بسمع نفس الملاحظات من شتا 82 ... إلبس جاكيت , إلبس لفحه, وين طالع بهالصقعه والشتا...وجهك سخن... اسى تحممت ... تطولش


رجعت الشتويه, المكيف بالسياره بشتغلش, بتصير تعرف الله عن قرب وانتي تدعي يارب ما تطفي السياره او يا رب تدور ,يارب يفتح باب السياره يا رب اي باب بدك بس افتح وخليني افوت وهناك ادعيه اخرى تضرب في باب الشبابيك الكهروبائيه واليدويه (شو الفرق طالما التنين بيتشغلو عن طريق مفك ومفضل يكون لونه بردقاني نظرا لشعبيه هذه المفكات على الشبابيك, ولمن يريد ان يعرف طريقه الاستعمال ,ليراسلني) وهي عاده :يارب يسكر الشباك ومن المحبذ ان تقارع في رب الشباك وانت موقف السياره على جنب حتى لا تضطر الى استعمال اسنانك في شد الشباك لفوق بدل من يدك اليسرى المشغوله في المقود وفي تمسيح الشباك من البخار المتراكم على الزجاج الامامي وفي البعبصه في الراديو لتختار اغنيه تليق بهذه البعصه (هذه كانت نصيحه اليوم لوجه الله تعالى ، تعال) . ومع سقوط اول نقطه مي الست اللي قدامك بتخلع... بس للأسف بتخلع بريك ,خايفه تزحلق .كعاده الحوائيات في خلق الازمات , بتقفل وبتبلش ازمه السير تبعت 4 على الساعه 1:30 ساعتها بتدعي يا رب تمشي وتلحق هذه الدعو بزمور للتذكير فإن الذكرى تنفع اللي مسكره الشباك وعامله حالها مش سامعه وبتطلع عليك بالمرايه بنظره" شو؟ اطير يعني!" طبعا كنت بفضل انها تطلع علي بالمرايه بنظره تانيه بشي وحده من نظرات الياي وخواتها! بس من جهتي اه طيري وما تهدي

واذا كانت شي فرفوره بالسياره اللي حدك بتدعى الله يا رب ما تمشي وبتضل تطلع عليها لحتى يلتقو نظراتكو وازا حدث والتقو طبعا بتفتح الشباك اللي حدك وبتقولها... شو هاد وبعدين حركه السير ...شكلها مقفله واكيد هي رح تجاوبك..." اه مقفله" وانتي بتدير وجهك لقدام انه مش معبرها يعني ومستعجل... وابن الشرموطه اللي وراك بيزمر يلا...(على شو مستعجل! مهو شايف السير, تطير يعني ) وانتي بتعاود تطلع عليها وبتقولها.. الطقس حلو ...على اساس انها من اجمد الجمل علشان تبلش مع صبيه بعد اكتشافي انه "قديش الساعه؟" ما عادت تنفع

وهي بدورها بترد عليك بحركه كفه ايدها انه بدها تزرق قدامك لانه السياره اللي قدامك زمان مشيت وانتي غاطس..وطبعا بتمرقها وازا كنك زلمه سكر الشباك بتبلش تدعي ادعيه ذكرنها سابقا... يارب تمشي ويارب يسكر الشباك, اللهم آميـن


رجعت الشتويه, الحيطان مرطبه ,السقف بيدلف مي ,والكهربا يا انها قاطعه او انها رح تقطع( خصوصي علشان احنا عرب) ولما تقطع الكهربا بتستسلم لوسيله الترفيه الوحيده "اينسامبل المزراب" وبخاصه ازا كان طاير شي كيس نقارش او تنكه كولا فاضيه وطبت تحت مصب المي من المزراب اللي عاده ما بينشزها شي ضربه رعد وبرق قويه ,بالاحرى صرخه اختي الصغيره وهي مرتعبه من الصوت وعاده ما يرن التلفون من احد الاقارب او الجيران يسأل " ألو... في عندكو كهربا " واجيبه بثقه اه ... فيه ! ليش قطعت عندكو؟ طيب تعال خود شوي... مشي حالك الليله...

ضربه الرعد تهز البيت اختي تقرر انها ستنام في غرفه امي
رجعت الشتويه, وخملت الناس مش الكل عنده قوه قلب يطلع من البيت بس مرات بتكون لصالحي, يعني لما ما بدي اروح على محل بيكون عندي حجه سخنه! انه الدنيا برد وشتا ما غدرت اطلع من البيت او انه مرشح وتعبان... بس ازا لا بد اطلع على شي محل فهو على "البيت الفلسطيني" مطعم ومقهى في الناصره بالاحرى بحب الطريق لهناك زقاقات السوق القديم ,الهوا البارد بيتحايل عليك كرقصه فلامنجو بتضرب وبتتنقل من زاويه لزاويه وبكون صبابا اكثر اذا رطبت الجو قطرات المطر..بعرفش ليش بس انا بحب تشتي علي الدنيا في3 محلات بالسوق القديم بالناصره وبملاعب الفوتبول وخصوصا اذا فريقي كان غالب وبلندن
رجعت الشتويه...
ملاحظه: توقفت عن كتابه هذا البوست مرتين الاولى اثناء العاصفه الرعديه خوفا ان يتضرر الكومبيوتر والثانيه اجا على بالي اوكل بوظه...


٥.١١.٠٧

صديقي الله

عبقريه زياد الرحباني اتتنا بباكوره اعماله وهي "صديقي الله" ديوان شعر وهو ما زال ابن 12 عاما
اخترت لي ولكم هذا المقطع..
قلت لهم

ألا تسكرون الأبواب
العاصفة هنا عند المفرق
وقالوا :
على مر الأيام تعودت الأبواب
وسوف تتسكر وحدها عندما ترى العاصفة
قلت : ألا تسكرونها أنتم بأيديكم القوية
قالوا : مللنا الحياة
امتلأت الأرض بالشتائم والحقد
زرعوا خناجر في قلب الكلام
صاروا يعدون ذكياً من يكفر أحسنهم بالله
ذكياً الذي كلامه اكثر الكلام سفالة

آه لو كان الكلام كالخبز يشرى
فلا يستطيع أحد أن يتكلم
إلا إذا اشترى كلاما
وقلت لهم
ألا تسكرون الأبواب
فقالوا :
ليت كل همومنا أبواب للتسكير
.

مشاكل جنسيه

بيسألو فلسطيني, عندك مشاكل جنسيه؟
بيجاوبهم, ليش انا معي جنسيه ليكون عندي مشاكل

٣.١١.٠٧

انابوليس على قفا مين يشيل

انا بوليس, واعوذ بالله من كلمه انا- بوليس
خريف انابوليس وخراريف انابوليس
خراريف انابوليس وخرى ريف انابوليس
حتى انت يا انابوليس
انابوليس؟! انت انابوليس
انابوليس في خدمه الشعب
انا انتي انابوليس
انابوليس يتبع...

ما قبل انابوليس

الى كل المعازيم او المجرورين وكل المندفعين والمتراكضين على ابواب انابوليس اذكركم...
لا تصالح!


لا تصالحْ!
ولو منحوك الذهبْ
أترى حين أفقأ
عينيكَ ثم أثبت جوهرتين مكانهما..
هل ترى..؟
هي أشياء لا تشترى..
:ذكريات الطفولة
بين أخيك وبينك،
حسُّكما - فجأةً - بالرجولةِ،
هذا الحياء الذي يكبت الشوق.. حين تعانقُهُ،
الصمتُ - مبتسمين - لتأنيب أمكما..
وكأنكما
ما تزالان طفلين!
تلك الطمأنينة الأبدية بينكما:
أنَّ سيفانِ سيفَكَ..
صوتانِ صوتَكَ
أنك إن متَّ:
للبيت ربٌّ
وللطفل أبْ
هل يصير دمي -بين عينيك- ماءً؟
أتنسى ردائي الملطَّخَ بالدماء..
تلبس -فوق دمائي- ثيابًا مطرَّزَةً بالقصب؟
إنها الحربُ!
قد تثقل القلبَ..
لكن خلفك عار العرب
لا تصالحْ..
ولا تتوخَّ الهرب!
لا تصالح على الدم..حتى بدم!
لا تصالح! ولو قيل رأس برأسٍ
أكلُّ الرؤوس سواءٌ؟
أقلب الغريب كقلب أخيك؟!
أعيناه عينا أخيك؟!
وهل تتساوى يدٌ.. سيفها كان لك
بيدٍ سيفها أثْكَلك؟
سيقولون:جئناك كي تحقن الدم..
جئناك. كن -يا أمير- الحكم
سيقولون:ها نحن أبناء عم.
قل لهم: إنهم لم يراعوا العمومة
فيمن هلكوا
غرس السيفَ في جبهة الصحراء
إلى أن يجيب العدم
إنني كنت لك
فارسًا
،وأخًا،
وأبًا،
ومَلِك
*** امل دنقل