٢٨.٦.٠٩

تل ابيب بالاخضر




دخان اسود في طهران, تنفس الصعداء في واشنطن. تكسير عظام في طهران , تجبير في تل ابيب. اسرائيل عودتنا دايما انه بكل عرس يكون الها قرص حتى لو مش معزومه ... الناس في ايران بتتشحر وتتبهدل وبتموت وبتنحبس علشان بدها التغيير , فاسرائيل وامريكا ,منختصرهن بإسرائيل لكل الاسباب اللي بتعرفوها واللي بتجهلوها... بيفكروا انه الناس هاي بتموت وبتتبهدل علشان اسرئيل وانهن بيطالبوا بوقف المفاعل النووي, وبدهن شي اتفاقيه اوسلو او على الاقل شي رودوس زغير! وانه الصبايا رح تشلح الجلباب وتحرق الصداري.
لزا ! بيطلعوا في تل ابيب بمظاهرات وبيطالبوا بتحرير ايران...وبيطالبوا بإعادة الانتخابات, ووقف سياسيه تكسير العظام !
اخد معي وقت لتني الاقي شي اشاره اجمد واوسخ من علامة التعجب اللي دعْمتكوا اياها وحيدة بعد جمله سياسه تكسير العظام... لانه الشغله بده وقفه, شوفوا سبحان الله شو الدنيا زغيرة من نفس المكان اللي بيتظاهروا فيه ضد سياسه تكسير العظام في ايران, رابين قال " كسرولهن عظامهن" والحديث بوقتها كان عن اطفال الحجارة... وما حدا في تل ابيب طلع يتظاهر ضدة...واليوم بيطلعوا يتظاهروا ضد مقتل 13 مدني على ايدين قوات الباسيج, لكن لما قتل 13 مدني بيد شرطه اسرائيل ... تل ابيب كانت ساكنة!

لهاي الدرجه العالم سخيف واعمى ؟! وقت الهجوم الاسرائيلي على غزة وين كنتوا؟ ... مش بغزة ! واسى عاملين فيها لاف اند بييس! وبدكوا العالم يكون عادل... يحرق سماكم, ليه ما تظاهرتوا ضد تزييف الانتخابات في لبنان مثلا..؟! ليه ما دبت فيكم الشهامه وقصفتم صناديق الاقتراع في حي التبانه بطرابلس؟! او ليش ما طلعوا تتظاهر ضد تزييف الانتخابات في مصر او على الاقل تضامن مع انتفاضة عمال المحله! بالقليله رفع شعارات ضد تزييف الانتخابات في مجلس ابو سنان؟!

هالتعاطف الاسرائيلي مع الشعب الايراني هو مجرد شيزوفرينيا شعبية.


هايدا لبنان !


من منطلق ايماني انه من فهم الحرب الاهلية في لبنان قد مَلَك الدنيا...وطبعا طمعي مش امتلكها لحالي... حاولت ابسطها لاصدقاء البرنامج


٢٥.٦.٠٩

ليالي الانس في رام الله

الثانية والنصف من بعد منتصف الليل, في فيلا بحي البالوع في رام الله ,محمود غارق في سبات عميق على فرشة عميناح في اسفلها ملصق صغير لتل اشتري فقط منتجات ازرق ابيض - مش الارجنتين-
وفي منامه يظهر محمد الحسيني في دشداشة نوم عسكرية وكوفيه نوم عسكرية مطويه بشكل حاد في المقدمة, وكان حلم

- محمود, انتي نايم؟
- لا شو نايم بس انه كنت غاطس بالهموم المحروم منها الشعب واموال الشعب...المهم انتي شو جابك اسى خير في اشي؟
- كل خير بس حبيت اسالك كم سؤال صارلهن 5 سنين محايراتني
- اه اسأل بس بسرعة لانه مثل ما انتي شايف مشغول شوي
-ولاي يا ابو المز مستئلع مني؟! ما علينا مش رح تفرق كتير اسى.. المهم شو صار مع خارطة الطريق؟ انشالله مشيت؟
- لا والله لا, في جماعة كلاب مسكرين الطريق ومش مصليين على النبي
-وبعدين معهن الاسرائيلية
- انا ما قصدت الاسرائيلية!
-لكان الامريكان
- ولا الامريكان
-مين لكان؟
-حماستان
- هههه يحرق حريشك هاي طلع مع قافية
-ولو محسوبك حاسبها على الوزن
- وجورج بوش تضايق انو الخطة ما مشيت؟
- مهو جورج بوش مشى... واسى ابو حسين صار رئيس امريكا
- ابو حسين؟ ولك مين ابو حسين, يعني امريكا صارت عربية؟
- شو صارت...؟ ابو حسين بيحكي انه من زمان اسلاميه؟
- مين هاد الاهبل؟
- هاد من سرايا هاواي, واسى هو رئيس امريكا
(محمد بينه وبين حاله هاي في حدا اهبل مني)
- يعني هيك هانت وحليناها
- حليناها وخليناها
-شو هي؟
- الحكومة, مهو بعد ما ربنا سحبك قصدي اخدك, ايي قصدي لما استشهدت...
- ليش انا استشهدت؟
- اه معلوم.. انتي بتفكر بالهوين تخلصنا منك؟
- هات نقرا الفاتحة على روحي
- اسى منقراها كمان شوي
- المهم بعد ما استشهدت , عملنا انتخابات وخابت معنا, بس احنا تلاميذك يا ريسضلينا وراهم لتنى حبسناهم... وهيانا شوفت عينك غرقانين بالنعيم..وكله بفضلك , يطول عمرك...
-وكيف الشباب؟ انشالله غرقانين معك؟
- الحمدالله,والله ربنا فصف عليهم شغل ليوم الشغل في غزة وهيهم بيساهمو لاعمار غزة
- ليش ابو علا خلص من بناية الجدار...؟
- لا بعدو, بعد في شغل عنده تلا بلعين ونعلين, بس في شويه اولاد زعران بيضلهن يخربوا
- وسوسو شو اخبارها حدا بيعرف عنها شي..
- ليش انتي ما بتيجيها في المنام؟
- والله دايما بجرب اجيها في المنام بس مش ملحق عليها.. كل يوم بتنام بمحل شكل هي سمالله عليها من يوم يومها بتحب تضلها تغير جو
- مش بس انتي مش ملحق عليها...
- وقلي القدس صارت عاصمة؟
- اها معلوم
- نشكر الله كنت عارف انه رح نروح شهداء بالملايين...ونحرر القدس
-هو الرؤيه تبعتك تخربطت شوي اتجاهاتها الشهداء راحوا بطريق والملايين اجت من طريق... بس المهم انه القدس عاصمة
- ياه يا سلام... واخيرا القدس عربيه
- هي عمليا صارت عاصمة السقافة العربيه لل2009
- يعني انتي بتحكي عن اشي كبير وضخم
- اها طبعا مهي واضحة!والبنك اكبر اثبات
-في كمان سؤال .. من كم يوم عملت جوله بالمنارة, لأطمن على الشعب...الناس كلها وجوهها صفرا على لون التكسيات شو مالهن مرعوبين؟
- لحظه شوي... بس احكي تلفون
- مع مين بدك تحكي بساعه زي هاي؟
-اسى بتشوف... الو الو ألو... اعطيني الزفت المسؤول عن الامن... بلا سيدي لا خرا...
بعد 30 ثانيه هاد تسيب هاد اهمال كيف بتتركو واحد يتجول بالمناره علشان يطمن ويتفقد على احوال الشعب...
عبر الهاتف
- لا سيدي احنا مسكنا شي وهم بس كان متخفي لياسر عرفات وخفنا نحبسة ونتبهدل...
- تتبهدلو اي والله لأنشر عرضكوا بالمناره...هيو طلعلي بالمنام... تعالو خدوه بسرعة

غرفة النوم تضاء...محمود يتعوذ من الشيطان ويشرب مياه غازيه...

٢٤.٦.٠٩

١٩.٦.٠٩

-انا شفاعمري يا جحش
- وانا جحش ! هيتك قلتها بعضمة لسانك

٤.٦.٠٩

ضاعت ولقيناها

   
     مثل ما الكل شايف انة اي دولة بتصنع اسلحة  بشكل ذاتي  امريكا بتلعن سماها وبتصادرلها السما وبتنضم على قائمة الارهاب...فمثلا  , لو المقاومة الفلسطينية اشترت اسلحة من امريكا , اي وحياه حجة ستو لاوباما وحياه القران اللي بمكتب توماس جفرسون, انه رح نحقق النصر.
مواسير صنع الخليل اتركوها للمي والمجاري , تخيلوا بناء قاعدة صواريخ في دير البلح ,  او يتسللوا الجدار في دي 9 , طبعا اول شي رح تكسب المقاومة رضى الشقيقة الولايات الاسلامية الامريكيه المتحدة..uisa وبهيك ربنا بيرضى على المقاومة على اساس الوحدة الاسلامية الجديدة. والشيخ ابو حسين زلمة اصيل وبيفهم بالعادات والتقاليد وبالاصول  وما رح يرفض الطلب.

الواد ده عبيط ؟

     
        بالمصري بيقولوا : الواد ده عبيط ولا ايه؟ , يعني بيخطب بشي 2500  واحد وابصر كم مليون بيراقب على شاشات التلفزيون والجزيرة نت... ودابك يحكيلك عن رؤيته للعالم  الاسلامي...رؤية وردية  اشهد باللة وحتى وردية غامقة من كتر ما هي وردية ضربت على الاسود, بيحكي عن الديموقراطية وهو في مصر, بيحكي عن حرية المرأة وطيارتة القادمة من السعودية  بعدها ما طفت ! يا زلمة حل عنا بيكفي هالتصريحات البايخة, ليش ما بتحكي عن ازالة المستوطنات الاسرئيلية  بدل وقفها, ولا ليش ما بتصرح انة لازم تجرد اسرائيل وامثالها من الاسلحة النوويه له يا ابو حسين ....
 
ملاحظة للحضور اللي كانوا في القاعة يعني انتو الصراحة فهمتوني غلط لما قلت شبشب قصدت شبشب مش تصفيق ولا تصفيق حار  ولا قصدت تصفير ولا قصدت زعاق معجبات مراهقات زي اللي منسمعه في حفلات الروك ... ولا وي لاف يو  ولا نيلة ..

ابو حسين في قصر عابدين

    
     بعد ما  فتحت على  موقع جريدة هأرتس , علشان اشوف شو صار بالعالم اخر 4 ساعات , ساقالله ايامات ما كنت اقرا الجريدة 18.5" *12.4" ويسكر مجرى الهوا  في الغرفة, ما علينا...  العنوان الرئيسي او نكتة اليوم!  نتنياهو قلق من خطاب اوباما  في القاهرة ! الزلمة ما نمش الليل وهو يفكر شو اوباما رح يحكي؟ 
يعني باللة عليكو انة عن جد هالقد فارقة مع  نتنياهو قرارات اوباما؟ لدرجة خلتة يترك فراش سارة او اي شرموطة تانية بهديك الليلة؟!

  يعني لنفرض انة اوباما خطب بالعالم الاسلامي والعربي من على منبر القِبلة الجديدة مصر, وقال:
  
   تعالوا يا منايك لوينتا انتو  واسرائيل بدكو تقرقعوا سماي؟ (كندرة بوجه اوباما)  مني وعلي يا جماعة الخير انا بطالب اسرائيل بوقف الاستيطيان, وانتو بتخلو شعبولة يغني يوروشليم شل زهاف ! (شبشب في وجه اوباما فبعد التحقيق والبحث تبين ان الشعب المصري بيفضل الشبشب على اي حذاء اخر وذلك لدقة انطلاقة ووصوله الى الهدف بتكاليف تعادل صحن فول ) وهيك منحل مشكلة 60 سنة 100 سنة  مش عارف بالزبط  بس مش مهم. وخلص فكونا عاد... انا وعدت اللة وامريكا انه انا ابو حسين (شبشب في وجه اوباما)  ما امشي بطريق بوش (شبشب في وجه اوباما) وكلكو شفتو كيف رحت على السعودية قبل القدس عملا بسنة الرسول لا تشد الرحال الا لثلاث....(شبشب في وجه اوباما -من الان سنختصرها لتكون شفوا)

 ونقطة مهمة يا جماعة الخير فكرو شوي واستعملو عقلكو.. ترى انتوا عقلكو زغير وبتغدروا تستعملوه كله (شفوا),  يعني شعوبكم العربية  بتقيم الدنيا وبتقعدها على شوية زعران  مستوطنين كلهن على بعض بيجوش كومتس! وانتو اعقل من انه تنجروا ورا هيك زعرنات (شفوا)
 وحتى انه ضابط شرطة يهودا والسامرة شلومي كعتابي اللي كان يطارد المستوطنين ويوقفهم عند حدهم حكى انهم " ذا سولت اوف ذا ايرث " وهو اكثر واحد بيعرفهم , سو مين احنا لنعاقبهم؟! (شفوا)

   واحنا كعالم مسلم (شفوا شفوا) اجا الوقت اللي  نهتم بقضايا اسلامية اهم من قضية الشعب الاسرائيلي (شفوا) مثل التفخيد (شفوا) ورضاعة الكبير (شفوا)وقضية هروب عمرو خالد والخطر الايراني (شفوا) وانا على ثقة في ظل وجود القيادات والانظمة العربية الحالية مستثنيين دعاة الارهاب وحلفائهم (شفوا) رح نوصل لطريق جديدة في الشرق الاوسط  ونعمل من سلطة عربية ريحتها بتشهي كل عابر سبيل , وهاي دعوة للكل يتذوق من سلطتنا العربية (شفوا)

 اما بالنسبة  لقضية تصريحات اسرائيل فاتركوا الموضوع علي وما حدا يتدخل ( شفوا)  انا رح اطالب اسرائيل بتنعيم  لغتها وتهجين الحوار...فمثلا. رح اطالبهم  بتبديل  مطلبهم في  الغاء احتفالية القدس عاصمة الثقافة لتحريم احتفالية القدس عاصمة الثقافة  طبعا لانة فيها اختلاط وانتو عارفين شو السيرة  (شفوا)

  فهيك رح يكون جو الخطاب الاوبامي  , فيعني منحب نطمن ابو يائير انه ما في حاجة للقلق ولتكبير الموضوع, الخرافية بتستاهلش, وبعدين يا ابو يائير الشباك اللي بيجب الريح سدة واستريح .


 




٣.٦.٠٩

استيطان 2009

   
    تم يوم امس التوقيع على اتفاقية تبادل اراضي بين الكيرن كييمت   من جهة وبين وزارة البناء والاسكان ودائرة اراضي اسرائيل من جهة اخرى ، وفق الاتفاقية سيتم تبادل اراضي بمركز البلاد والتي هي بملكية  الكيرن كييمت بأرضي دائرة الاراضي في الجليل والنقب, حجم الصفقة هو بين 50 -70 الف دونم, الواقع السوداوي, ان الاراضي التي في مركز البلاد هي مضمونة يهودياً , اي انها في مركز المدن والتجمعات اليهودية , اما  الاراضي التي في الجليل والنقب هي اراضي دولة او مشاع ومن الممكن ان تكون اراضي متنازع عليها من قبل سلطات ومجالس محلية عربية لأدخالها ضمن الخارطة الهيكلية للقرى والمدن العربية, وفي حالة نقلها الى يد الكيرن كييمت فعلى الدنيا السلام!

 فالكيرن كييمت  هو  صندوق  يهودي عنصري استولى على الاراضي الفلسطينية عن طريق النصب والاحتيال, وحولها الى يهودية الملكية , وحسب " شريعة" الكيرن كييمت فإن الاراضي التي بملكيتها (2.5 مليون دونم  اي 13% من مسطح  دولة اسرائيل) هي اراضي ليست للبيع والهدف منها الاستيطان اليهودي,  فعملياً ان نقل 70 الف دونم في الجليل والنقب للكيرن كييمت  هو جزء من مشروع تهويد الجليل والنقب,  فلو بقيت هذة الاراضي تحت ملكية  دائره اراضي اسرائيل او وزاره الاسكان فمن الممكن للسلطات العربية تحصيل ولو جزء بسيط من هذة الاراضي وضمها الى خارطتها الهيكلية ولكن في هذة الحالة  فلن نستطيع  تحصيل دونم واحد من الكيرن كييمت فدولة اسرائيل بجهازها القضائي لم تستطع ان توقف الكيرن عند حدها فعلى سبيل المثال في عام 2004 اعترض السكان اليهود على شراء سكان عرب لبيوت في مستوطنه كرمئيل  فمنذ تلك اللحظة قررت الكيرن كييمت ان تبيع املاكها فقط لليهود رغم قرار المحكمة الذي يلزمها ببيع الاراضي لكل من يريد, عندها هددت الكيرن كييمت الدولة بوقف التعامل معها ! وما زالت القضية في ارشيف المحاكم

اذا هذا هو الاستطيان الجديد او الصهيونيه الجديدة كما اطلق على اسم الصفقة, دون اي اعتبار للمواطن العربي الفلسطيني صاحب الارض,   ولم نسمع اي رد فعل ولا حتى استنكار تعودنا عليه, اين لجنة المتابعة من الموضوع هل ما زالت مشغولة بأنتخاب تعيين رئيس مباشر بطريقة غير مباشرة؟!

  متى سيحين الوقت لتأسيس صندوق للحفاظ على الاراضي العربية, فكما هو معروف الاسرائيلي يعشق الشيكل وبيموت في  الدولاروعلى استعداد ان يبيع الارض والعرض,   يعني  لقد حان الوقت مجددا للحد من الترف الخليجي والعربي وتأسيس هذا الصندوق لشراء اراضي تبقى بملكية عربية, او على الاقل تفكيك الكيرن كييمت وحليفتها  " هيمنوتا" التي تشتري اراضي في  الضفة الغربية  وجمعية " إلعاد" لشراء بيوت عربية في القدس والمدن والقرى الفلسطينية...

٢.٦.٠٩

ريكويم فلسطيني

  
 عتمة النهار في الخيمة, في الزنزانة
ونور يسطع من شقوق حائط المدرسة
يبحثون عن حامل الأمل, عن ذراعين تحمل وردة
وربما تحمل بندقية لتحمي زهرة نرجس قد ذبلت
جهاز الارسال ؛ لقد وجدناة
بكائه يصعق المدينة، وضعته جدته على لوح الصبار
اتركوه يشعر بالحقيقة
الام تنزف , الدم يختلط مع التراب
خذوها الى المستشفى
هذا غير ممكن يجيب صوت من وراء الحاجز
لقد فجرنا المستشفى وقتلنا الطبيب
اذهبوا فقد حان دوري لأغتصب الممرضة

يا ذا القرابين 
 موكب اطفال قلوبهم مخرقة في الطريق اليك
هنيأَ هنيأ
ُهُدمت مئذنتين وأُحرقت كنيسة
هنيأَ هنيأَ
 نهر دموع الثكالى يختلط مع نهرالدماء
هنيأَ هنيأَ
 يا ذا الرحمة 
تعبت البندقية 
والدبابة اتلفها الصدأ
 فارحمهما ان كنت لا تريد الرحمة للجسد

 يا ذا الفرج
 اخرجنا من هذا القبر الواسع