8.1.08

عن الفيس بوك

قبل 6 او 7 اشهر بلشت توصلني ايملات من اصدقاء ضمن قائمه الاتصال في الهوتميل, بيطلبو مني انضم للشبكه الاجتماعيه "فيس بوك" , انا ما اهتميت بالموضوع وحتى صرت امحى اي ايميل بيوصلني من الفيسبوك من غير ما افتحه..

لحد ما شي يوم بيحكيلي صاحبي "شو ليش بعدك مش مشترك بالفيس بوك ؟" انا فوتت في ضغط انه ضاع مني اشي او اني فقدت مفتاح الخروج من قفص "الغير مقبولين" وبخاصه انه صديقي هو المرشد الخاص بألا هبل وأكديد بيحكي عن اشي جامد

...

شو في بالفيس بوك؟

بيجاوبني كلهن هناك ! وانا متأكد انها رح تعجبك

روحت على البيت وكالعاده فنجان نس كافيه بدون سكر وقعدت قبال الشاشه اشوف شو جديد اليوم , مواقع الاخبارهي هي... ابو مازن بيدعو الاخوه في حماس للحوار بس بشروط !(سامعها هاي من قبل بس ناسي من مين, يمكن اولمرت) وطوشه عموميه وحادث طرق مع خمس اصابات خفيف, موقع السبورت برضه فيش اشي جديد فريقي في المحل الاخير والإداره تعلن انها وراه المدرب في كل خطوه بيخطيها... يا عمي مين ورا مين! احنا في المرتبه الاخير وفش حدا ورانا.. يلا عاد أقيلو حدا على الاقل عامل الصيانه اوالبياع في الكيوسك السندويتشات صارت تخزي وغليانه..

ومباشره لافحص ازا وصلني ايميل

ربحت 100.000 دولار من موقع بلاك جاك وورلد- على الجانك ميل مباشره حكولي هيك رسايل بتخرب الكومبيوتر وبما اني اشتراكي فقير فبسرعه بقتنع انه المييت الف دولار هنه خراب ديار (لو كانو باليورو كان ممكن ابحبش في اشتراكيتي على شي محل ل 100 الف يورو)ء


الايميل الثاني من منهل فيه صور لأفخم فنادق بالعالم

O+طلب بتبرع دم من فئه

لسوزان كارمن ابنه السبع سنوات من لانكستر في بنسلفينيا وازا ما بتتبرع او ما بتعمل فوروورد 15 من اصدقائك فإنت فش عند قلب -على الجانك مييل مباشره وحتى عملت بلوك


طلب توقيع على عريضه لوقف القتال الداخلي في غزه -وقعت على عرضها وعملت فوروورد ل15 صديق احسن لشي يوم يلوموني بسقوط غزه مثل ما لامو سيدي بسقوط المجيدل في ال1948


منحه دراسيه في جامعه فينكس! شو يابا؟

فادي يطلب منك الانضمام الى الفيس بووك ! دو يو أكسبت؟...معلوم اكسبت! بيصير اضيع فرصه زي هاي


وفتحت اول صفحه..الله يفتحها بفييس الجميع

التسجيل كتير سهل... اسمك, سنك وعنوانك وقضيه العنوان تخطيتيها بسهوله سجلت رغم عني "غير معروف" لأسباب امنيه

اهتماماتك: مش مهم... وفوتت على قائمه الاتصال لأعلن لهم اني قادم وتفضلو على الاستقبال

اولى الصديقات كانت فرحانه انها اول من يخربش على حيطي! وكثير من رسائل اهلا وسهلا ومبروك انضمامك...ناقص بس نقوط


وبلشت ابحبش عن زوايا ممكن تهمني بالفيس بوك.. انك تعرض الموسيقى اللي بتحبها.. بالموت لقيت غنويتين لزياد الرحباني !او تقييم افلام سينما اغلبها امريكيه وتقارن تقييمك مع اصدقائك ,كانت النتائج بتبهدل وفي فرق كبير بالنتائج بيناتنا... فرق مع تضاريس جغرافيه متل هون والسما... على الرغم من انه شي مره بالاسبوع منحضر فيلم سوا وبنطلع بنفس الانطباع تقريبا ... او انه منكزب على بعض


ان تكون سيد نفسك! وتنشئ مجموعه انتى بتضع اهدافها وقوانينها حتى لو انك كنت في سوريا لحد قبل اسبوعين

من هاد المنطلق بتطلاقي 150مجموعه بتنادي, يلا نكون ايد وحده ونجمع اشتراك مليون فلسطيني على الفيس بوك

والآف المجموعات التابعه للجمعيات والحركات الاجتماعيه, مجموعات منطقيه حتى تعبر عن حبك لحارتك او مدينتك...بإختصار انه كل واحد انه لاقى الخليه الناقصه بهالعالم بيعمل منها مجموعه.
وكل مغني او شبه مغني عامله شي 5500 مجموعه .
اكثر مجموعه مزعت مصريني من الضحك هي مجموعه " ركاب باص ابو نضال", شكرا للست بكريه اللي لفتت انتباهي لهاي المجموعه وهي لمجموعه الطلبه اللي بنتقلو في باص ابو نضال للكليه الارثوذوكسيه في حيفا.

وطبعا بتغدر تبعت الهدايا للاصدقاء من بسكوته لحد خاروف العيد. وازا مش طايق حدا بتغدر تشرشحه وترمي بيانو على راسه... وللخجولين في امكانيه انك توصل رسالتك الغراميه بدون ما حدا يعرفك... لحد ما
تقوى قلبك وتعبر عن حبك.

ولنا متابعه للطيزبوك قصدي الفيس بوك الله يبيض فيسكو متل ما بيضتو الفيس بوك
وصار الشبكه الاكثر شعبيه على الانترنت , تخترق موقعها بين جوجل,يوتيوب, الماسنجر وفيكوبيديا...ونحن السبب!

هناك 3 تعليقات:

Bakria يقول...

يا اخي لطيف الفايسبوك مرات
بس السيء انه عم بصير نادي تعارف
شو هالشغله هاي
كل ما فتحوا شبكه اجتماعيه ووصلت لعنا، اسهمها بتزيد اكثر

غير معرف يقول...

مرحبا
انا بين يوم وليله اكوانتي سكري ليه مابعرف
كيف ممكن ارجعو بليييز ساعدوني

هاد ايميلي
tamer_-_2009@windowslive.com

tofi يقول...

انا احد المنتسبين للفيسبوك هو صحيح تافه بس لما تتعرف فيه على ناس مثلك طرحهم جميل وخفيف دم بيبلش يصير ممتع لكن هيك العرب اي شي جديد بيستخدمو جانبه السيء فقط وبعدين هو موضه وراح تنتهي