15.5.07

تيسير الكركي والقهوه البارده

اليوم كان واحد من الايام اللي ما صدقت على الله وينتا يخلص , بلش بخراب البراد واصابه واحد من العمال بحادث غريب نوعا ما.. كان بدو يعيير مرايه السياره ,انكسرت وانجرحت ايده ...مستشفى...اربع قطب...صفت حلو.. بالسلامه انشالله على الرغم انه استفتحت نهاري بمسج لطيف وقلت في عقلي...شكلو احلى نهار . بس كان العكس على الاطلاق
شو بدكو بالطويله المهم اني وصلت الشغل وكالعاده فنجان قهوه... مع "تومر" وبدا اليوم تومر متحمس لفنجان القهوه على غير العاده وحتى انه عزمني على فنجان اسبرسو.... ورفضت لاني بحب اول فنجان يكون عربي فما الحب الا للحب الاول وبعدين منخبص بالقهوه كيف ما كان.... وسألت تومر شو سر الحماس ليعزمني؟ بيحكلي ,تيسير الكركي, هو السر
تيسير الكركي هو سائق تاكسي من القدس قتل على يد يهودي يوم امس على خلفيه عنصريه, فقط لانه عربي والقاتل هو قادم جديد من فرنسا...
طيب شو علاقه تيسير الكركي بقهوتنا يا تومر؟ قال انها مجرد محاوله لتخفيف سمه البدن عن هيك خبر
تومر هو شاب اسرائيلي نموذجي جدا يتغذى ما يعطيه له الاعلام الاسرائيلي ويذهب جيش الاحتياط كلما نادوه وتمنى لو انه دخل لبنان في الحرب الاخيره ليريهم من اين تؤكل الكتف ! -لا يابا, الله سترانه تومر ما فات لبنان! فينغراد سمع عن تومر ؟ بلكي لو اشترك كان ربحوا الحرب ؟؟ وتومر بيحب يوكل الحمص -من عند حمص سعيد بعكا-مع انه مش طيب وما بنصح حدا
المهم انه تومر بدو يخفف معاناه سنين بخلقه فنجان اسبرسو بكباي بلاستيك
ولك يا تومر على هيك حساب يا دوب كل حقول القهوه بغابات الامازون في البرازيك تكفي لنخفف وجع النكبه
بحكيلو انتو كل يوم بتقتلو عرب شو اللي شدك لتيسير الكركي؟...شو بيجاوبني , انه تيسير بريء
-انا ما بدي احكيلك انه حتى المهندس هو بريء, بس اشكاليه البرائه هاي اسهل اشي كل الشهدا الفلسطينيه ابرياء! لانهم بيدافعوا عن ملك خاص وانتي اكيد سمعت عن القانون اللي رح يصادقو عليه بالكنيست انه يحق لاي شخص اطلاق النار من سلاحه الخاص دفاعا على من يعتدي على املاكه الخاصه وهو ما يسمى
قانون درومي
والجندي او اي اسرائيلي اخر يقتل في الضفه والقطاع هو معتدي سارق, فحتى القانون الاسرائيلي لا يحميه فلسلفيا ونظريا...
فيا تومر لكي لا تزداد حوادث الاعتداءات العنصريه .. اوقفوا العنصريين من اللذين بينكم تعلمو الاعتراف بالحق ولا تخافو من الحقيقه
هناك شعب يقتل ولا احد يسمع صراخه, ابواق صحافتكم ليست الا قطن اذنين عن الحقيقه
اقرأ نصوص غير نصوصك اسمع قصص قصتك شو ف ناس غير ناسك! هيك بتصل للحقيقه
العنصريه بينكم بتزيد وما حدا معترض وبس شي واحد سكران يرسم صليب النازيه بشي مقبره في باريس بتقوم الدنيا وبتقعد وهون شعارات " الموت للعرب " مليه الدنيا شعارت " كاهنا صدق" في كل محل وانتو لا حياه لمن تنادي . ولك سميتللي بدني الله يسم بدنك... برد فنجان القهوه

هناك 8 تعليقات:

eman يقول...

هههههه
يعطيك العافية
المهم فهم تومر؟
فكرك هي بس قصة عنصرية!العنصرية اخف من اللي بشعر فيه الاسرائيلي..بتصور يمكن هو شعور الصراع للبقاء..واحنا الطرف المعادي...لازم حد يختفي ...مممم
موقع جميل :)

غير معرف يقول...

اااااااااااااخ يا قلبي

شايف هاي الجملة؟ كتبتها اليوم 8 مرات ب 8 مدونات!
جرحي المكابر وسنرجع يوما والله بعين

مليش خلاق احكي اشي ثاني.. يمكن لانو ما في شي ثاني ينحكى..
هني غير شكل يا عزيزي بدهاش شطارة الواحد يفهم انو هو بنادم بس للاكل والشرب وممنوع يفكر يعمل اشي واذا سمعو حسو بسكرولو ثمر بطعشر طريقة..

نفسي يرتفع ضغطي مرة فوق ال 100/60! بلكي بنجلط :D

خربطنا نبلش.. بدي اروح انااام انشالله ما بفيق ..

اوعك تفكر انو متشائمة ولا مالني اشي.. عااااااااااااادي

ثلاثاء يقول...

الف مره قلتلك تشربش قهوه من عند حدا غريب
اكيد مش من عند يهودي في يوم النكبه

شربت القهوه؟ صرلك اشي؟

:P

الناطق بلسان الباب الاخر يقول...

ايمان
نورتي المدونه...تومر ما بدو يفهم لانه باللحظه اللي ممكن يفهم رح يفقد كيانه! على الاقل هيك هو بيفهم فبيفضل يكون مش فاهم وليده هي تكون العليا .. القضيه وما فيها عزيزتي قصه عنصريه وماديات!

خليكي على الشوف
****
الجليليه

اااه ياقلبي
برضو عادي.. الجرح عادي والوجع عادي والتشائم عادي والضغط عادي والجلطه عادي.. والموت عادي
ااه قلبي على شو تعودت
****
بكريه
علشانو غلياتك طالعه نازله بالقهوه وعلشنك عرفتي عن ظهر قلب كيف بحب قهوتي ووين بحب اشربها وعلشنك حافظه مواعيدها بشرب هالقهوه عند يهودي بيوم النكبه... اصلا شو ممكن يكون رمزي اكتر من هيك !
خايفه علي؟! اه يا قلبي

yasmina يقول...

ابراهيم
بتقلب علينا المواجع
الوضع اللي احنا فيه اعجب وضع بالعالم ويمكن ما تلاقي حد زينا
مزدوج الهوية
مشتت الفكر
مزدوج اللغة
العالم لا يعرف عنه شيئ
مشبوه ضمنا

والكثير الكثير

سلام قبل ما انفجر

spellz يقول...

awalan a7eb ashkoraak 3alaa klamak l gameel awee fe 7a22i
+ mahma 3amalt fana msh aktr mn wa7da btktb ay klaam

enta 3aysh waqe3 m3aleena

w kan 3ayz y3zemak? galo alb ezaay ih kalam l a5laa2 da w kmaan fe kobaya plastic y3ny msh haysta3mlha tany?
la laa laa da yo7sad... ba5aro yabny!!
:'( ya 7abayby rabena ya5od eli kan l sabab yb2a l beet beit abookoo we welaad l kalb yday2okoo

yallah akeed l shams hatoshro2 mahma tal l leil

الناطق بلسان الباب الاخر يقول...

ياسمينه

انا لا اقلب المواجع... ولا ابحث عنها انا اعيشها مثلك تماما فقضيه ان نواجه الوجع مساله وقت اما في نشره الاخبار القاده او عند مفترق الطرق اول البلد..

وبما وضعنا لا يعلم عنه احد فا مهمتك ان توصلي العلم الينا...
اتمنى انك لم تنفجري..فحاله الانفجار طويله ولنا الصبر وفي الناس المسره ... سلام


****
spellz
انتي تسحقي هذا الاطراء فمدونتك ليست "كمان مدونه" واتمنى ان تشرق الشمس في نهار اخر

Logged out يقول...

lateef! nice post